मोबाईल गेमच्या आहारी गेलेल्या एका 16 वर्षीय मुलाने फक्त ऑनलाईन गेममध्ये पैसे हरल्याने आत्महत्येसारखे टोकाचे पाऊल उचलल्याची धक्कादायक घटना नाशिक शहरातील नाशिक रोड परिसरात घडली आहे. सम्राट भालेराव (वय 16) असं आत्महत्या केलेल्या युवकाचे नाव असून तो जय भवानी रोड, डायना नगर भागात राहायचा.
त्याच्या आत्महत्येमुळे संपूर्ण परिसर सुन्न झाला असून, त्याच्या कुटुंबावर शोककळा पसरली आहे. तो गेल्या काही महिन्यांपासून मोबाईल गेमच्या आहारी गेला होता. दिवसेंदिवस तो मोबाईलमध्येच गुंतून राहत होता. घरच्यांनी अनेकदा समजावूनही त्याचे मोबाईलचे व्यसन वाढतच गेल्याचं सांगण्यात येत आहे. सोमवारी रात्री तो एका ऑनलाइन गेममध्ये पैसे हरला आणि त्यानंतर आलेल्या नैराश्यामुळे त्याने स्वतःच्या राहत्या घरी गळफास घेऊन आत्महत्या केली.
या घटनेची माहिती सकाळी मिळाल्यावर घरातील सदस्यांनी तातडीने त्याला रुग्णालयात नेले, मात्र डॉक्टरांनी त्याला मृत घोषित केले. त्याचा मृतदेह शवविच्छेदनासाठी जिल्हा रुग्णालयात पाठवण्यात आला आहे. सम्राटच्या पश्चात त्याची आई आणि दोन लहान बहिणी असा परिवार आहे. घरातील एकमेव पुरुष सदस्य असलेल्या सम्राटच्या निधनाने कुटुंब उध्वस्त झाले आहे. नाशिक रोड पोलीस ठाण्यात आकस्मिक मृत्यूची नोंद करण्यात आली असून, अधिक तपास सुरु आहे.
मुलाच्या ऑनलाईन गेमने उडाले 5 लाख
काही दिवसाआधी कोल्हापूर जिल्ह्यात डिजिटल अरेस्टमुळे कोट्यवधी रुपयांची फसवणूक झाल्याचे प्रकरण ताजे आहे. राजारामपुरीत साडेतीन कोटीची आणि जुना राजवाडा पोलीस ठाण्यात डिजिटल अरेस्टमुळे आठ कोटीची फसवणूक झाल्याचे गुन्हे दाखल आहेत. असं असताना आता ऑनलाइन गेममुळे एका शेतकऱ्याला पाच लाख रुपयांचा फटका बसला आहे. म्हशी घेण्यासाठी सात लाख रुपये साठवले होते. पण मुलाने ऑनलाईन गेमच्या नादात पाच लाख रुपये गमावल्याची घटना राधानगरी तालुक्यात घडली.
कोल्हापूर जिल्ह्याच्या राधानगरी तालुक्यातील एका शेतकऱ्याने म्हशी घेण्यासाठी 7 लाख रुपये बँक खात्यात साठवले होते. पण सहावीत शिकणाऱ्या त्यांच्या मुलाने मोबाइलवर ‘फ्री फायर’ गेम खेळताना नकळत काही अॅप घेतले. त्यानंतर काही क्षणात बँक खात्यातील पाच लाखांची रक्कम गायब झाली.
खात्यातील पैसे गेल्याच्या मेसेजमधील ट्रान्झेक्शन आयडीवरून सायबर पोलिसांनी गुन्ह्याचा उलगडा केला. बँक खात्याशी कनेक्ट असलेला मोबाइल नंबर लहान मुलांच्या हाती दिल्यानंतर काय होऊ शकते, याचा धडाच पालकांना मिळाला.