मुंबई पाठोपाठ आता पुण्यातही कोरोना व्हायरसचा रुग्ण आढळून आला आहे. पुण्यातील एका रुग्णालयात उपचार घेणाऱ्या 87 वर्षांच्या पुरुषाला कोरोनाची लागण झाल्याचे समोर आलं आहे. या वर्षातील पुण्यात आढळून आलेला हा पहिलाच कोरोना रुग्ण आहे. पुण्यात कोरोनाचा रुग्ण सापडल्यानंतर आरोग्य कर्मचाऱ्यांनी आवश्यक ती काळजी घेण्याच्या सूचना करण्यात आल्या. मात्र कोणी घाबरून जाऊ नये असंही आरोग्य विभागाने स्पष्ट केलं आहे.
राज्याची राजधानी मुंबईमध्ये आतापर्यंत 53 कोरोना रुग्ण सापडले आहेत. सोमवारी, 19 मे रोजी एकही कोरोना रुग्ण सापडला नाही. परंतु पुण्यामध्ये मात्र कोरोनाचा एक रुग्ण सापडल्याने आता खबरदारीच्या उपाययोजना केल्या जात आहेत.
मुंबई महानगरात बृहन्मुंबई महानगरपालिकेच्या रुग्णालयांमध्ये उपचार आणि मार्गदर्शनाची सोय उपलब्ध आहे. सेव्हन हिल्स (Seven Hill) रुग्णालयामध्ये 20 खाट (MICU), 20 खाटा मुले व गरोदर स्त्रियांसाठी, 60 सामान्य खाटा तयार ठेवल्या आहेत. तसेच कस्तुरबा रुग्णालय येथे 2 अतिदक्षता (ICU) खाटा व 10 खाटांचा वॉर्ड उपलब्ध आहे. आवश्यकता भासल्यास सदर क्षमता त्वरित वाढविण्यात येईल.
गेल्या काही दिवसांमध्ये दक्षिण-पूर्व आशियातील देशांमध्ये कोरोना रुग्णांच्या संख्येत वाढ होताना दिसत आहे. मात्र कोरोनाचा हा व्हायरस घातक नसल्याच आरोग्य विभागातील तज्ञांकडून सांगण्यात येतं आहे.
हाँगकाँग आणि सिंगापूरमध्ये कोरोनाचे रुग्ण वाढले
हाँगकाँग आणि सिंगापूरमध्ये कोरोनाच्या रुग्णसंख्येत मोठी वाढ होत असून, त्यामुळे आशिया खंडात कोरोनाच्या लाटेची भीती व्यक्त होत आहे. कोरोनाची उत्पत्ती चीनमध्ये 2019 मध्ये झाली आणि 2020 मध्ये जगभर हा विषाणू पसरला. त्यानंतर कोरोनाने कोट्यवधी लोकांचा बळी घेतला. जगाची अर्थव्यवस्था ठप्प झाली. मात्र 2022 पासून जग हळूहळू पूर्वपदावर आले. परंतु हाँगकाँग आणि सिंगापूरमध्ये कोरोनाने पुन्हा एकदा डोके वर काढल्यामुळे ही पुन्हा लाट येणार का अशी भीती व्यक्त होत आहे.
हाँगकाँग आणि सिंगापूरमधील दाट लोकवस्तीच्या ठिकाणी कोरोनाच्या रुग्णसंख्येत झपाट्याने वाढ होत असल्याचे वृत्त ‘ब्लूमबर्ग’ने दिले आहे.
सिंगापूरमध्ये अलर्ट
कोरोनाच्या रुग्णवाढीच्या पार्श्वभूमीवर सिंगापूरमध्ये अलर्ट जारी करण्यात आला आहे. कोविड रुग्णांची संख्या गेल्या आठवड्यापेक्षा 28 टक्क्यांनी वाढली आहे. कोरोनाचा हा प्रकार 2020 च्या लाटेपेक्षा गंभीर आहे. वेगाने विषाणू पसरत असून लोकांनी लसीचा बुस्टर डोस घ्यावा असे सिंगापूरच्या आरोग्य मंत्रालयाने म्हटले आहे.