लेखणी बुलंद टीम :
मेष : बदल स्वीकारा
दिनांक ८, ९ हे संपूर्ण दोन दिवस व १० तारखेला दुपारपर्यंत असा अडीच दिवसांचा कालावधी फारसा अनुकूल नाही. त्यामुळे या कालावधीमध्ये निर्णय घेताना विचार करा. इतरांच्या बोलण्यावर विश्वास ठेवू नका. जोपर्यंत प्रत्यक्षात डोळ्यांनी एखादी गोष्ट पाहत नाही, तोपर्यंत त्यावर विश्वास ठेवू नका. अन्यथा तुमचे काम फसणार आहे. कारण नसताना वादविवाद होऊ शकतो, त्यामुळे शांत राहून निर्णय घेणे सर्वात चांगले. परिस्थितीनुसार बदल स्वीकारा म्हणजे नुकसान होणार नाही. बाकी दिवसांचा कालावधी चांगला असेल.
व्यवसायात प्रगती होईल. मात्र जबाबदारीने काम करावे लागेल. नोकरदार वर्गाला कामाव्यतिरिक्त इतर गोष्टीत लक्ष घालून चालणार नाही. खर्च जपून करा. घरगुती वातावरण चांगले कसे राहील ते पाहा. जोडीदाराची साथ मिळेल.
वृषभ : ध्येय साध्य होईल
१० तारखेला दुपारनंतर एवढा अर्धाच दिवस शुभ नाही. बाकी सर्व दिवस चांगले आहेत. चांगल्या दिवसांचा कालावधी मोठा आहे असे म्हणायला हरकत नाही. शुभ ग्रहांची उत्तम साथ मिळेल. आत्तापर्यंत मनामध्ये बरेच वाईट विचार येत होते. कोणत्या गोष्टीला प्राधान्य द्यावे हेच कळत नव्हते. सध्या मात्र तुम्ही तुमच्या मतावर ठाम राहणार, त्यामुळे निर्णय घेणे सोपे जाईल. शिवाय नुकसान होणार नाही. इतरांवर आपले मत लादण्याचा प्रयत्न कराल आणि ते यशस्वी होईल. व्यवसायात ठरवलेले ध्येय साध्य होईल.
मिथुन : कामे मार्गी लागतील
सप्ताहात असा कोणताच दिवस नाही की त्या दिवशी काळजी घ्यावी लागेल. या कालावधीत प्रतिभा उंचावेल. काही आठवड्यांपासून परिस्थिती अशी होती की काही दिवस चढउताराचे होते, त्यामुळे काळजी करायला लावणारे वातावरण होते. सध्या मात्र तसे नाही. शुभकाम करण्याचा हा योग आहे असे समजा. काळजी करण्याची गरजच नाही. सर्व दिवस चांगले असतील. बाकी राहिलेली कामे मार्गी लागतील, त्यामुळे कामातील आणि इतर गोष्टीतील आनंदही काही वेगळाच असेल. व्यवसायात धाडसी निर्णय घ्याल तो आगामी काळासाठी चांगला असेल. नोकरदार वर्गाला नवीन आलेले प्रकल्प पूर्ण करता येतील. आर्थिक बाबतीत चिंता वाटणार नाही. समाजसेवेची आवड राहील. नातेवाईकांशी कार्यक्रमानिमित्त भेटीगाठी होतील. भावंडांना मदत कराल. धार्मिक गोष्टीत गुंतून राहाल.
कर्क : संधी मिळेल
या आठवड्यात चांगल्या गोष्टींचा शुभारंभ व्हायला वेळ लागणार नाही. यापूर्वी बराच मानसिक त्रास झाला. कारण नसताना वैर निर्माण झाले. मनाची घालमेल झाली. या सर्व गोष्टींवर पर्यायी मार्ग मिळणार आहे. सध्याचे दिवस तुमच्या हातचे आहेत असे म्हणायला हरकत नाही. आजपर्यंत ज्या गोष्टी तुमच्यापासून लांब होत्या त्या आता जवळ येतील. तुमच्याविषयी इतरांना कौतुक वाटेल व गढूळ झालेले वातावरण चांगले होईल. इतरांचे लक्ष वेधून घ्याल. शाब्बासकी मिळेल. व्यवसायात नवीन संधी मिळेल. नोकरदार वर्गाची आजपर्यंत जी तारेवरची कसरत होत होती ती कमी होईल. आर्थिक भार हलका होईल, राजकीय क्षेत्रात प्रसिद्धी मिळेल. कुटुंबासोबत मौजमजा कराल. धार्मिक स्थळांना भेट द्याल. मानसिक समाधान लाभेल. आरोग्य उत्तम राहील.
सिंह : वर्चस्व राहील
दिनांक ४, ५ हे दोन दिवस शुभ नाहीत, त्यामुळे या दिवसांत महत्त्वाचे काम करताना विचार करा. चांगले दिवस असतील अशा वेळी महत्त्वाचे निर्णय घ्या. इतरांच्या वैयक्तिक गोष्टीत हस्तक्षेप करू नका. जिथे वाद-विवादाचा प्रसंग येईल तिथे शांत राहा, त्यामुळे तुम्हाला स्वत:ला त्रास होणार नाही. कामात व्यस्त राहिलेले चांगले राहील. बाकी दिवसांचा कालावधी चांगला असेल. चांगल्या दिवसांमध्ये घेतलेले निर्णय योग्य असतील. व्यवसायात मागील काही दिवस कटकटीचे गेले, पण सध्याचे दिवस चांगले असतील. नोकरदार वर्गाला कामाच्या संदर्भात चांगली बातमी ऐकावयास मिळेल.
कन्या : व्यवस्थापन नीट करा
५ तारखेला दुपारनंतर दिनांक ६ व ७ हे संपूर्ण दोन दिवस म्हणजेच अडीच दिवसांच्या कालावधीत जपून पाऊल टाकावे लागेल. कारण या दिवसांत आपल्याला एखादी गोष्ट सहज करता येणार नाही. त्यामध्ये तांत्रिक अडचणी येऊ शकतात. काम सोपे असेल, पण त्यासाठी उशीर होईल, त्यामुळे तुमची चिडचिड होऊ शकते. म्हणून व्यवस्थापन नीट करा म्हणजे कामात व्यत्यय येणार नाही. बाकी दिवसांचा कालावधी चांगला असेल. व्यवसायात गुंतवणूक करताना विचार करा. नोकरदार वर्गाचे काम सुरळीत चालेल. आर्थिक व्यवहार जपून करा. समाजमाध्यमांचा वापर करताना भान ठेवा. एखाद्या गोष्टीशी तुमचा काहीही संबंध नसताना गैरसमज वाढू शकतात. कुटुंबात असणारे गैरसमज वेळीच दूर करा. जोडीदाराला विश्वासात घेऊन निर्णय घ्या.
तूळ : नियंत्रण ठेवा
दिनांक ८, ९ हे संपूर्ण दोन दिवस १० तारखेला दुपारपर्यंत असे हे अडीच दिवस बेताचे राहतील. या दिवसांत मनाविरुद्ध घटना घडू शकतात, त्यामुळे तुमची प्रतिक्रिया स्पष्ट असू शकते. मात्र एक गोष्ट लक्षात ठेवा की ही प्रतिक्रिया देण्याची वेळ नाही. आपले काम व्हावे असे वाटत असेल तर शांत राहणे उत्तम. त्यासाठी स्वत:वर नियंत्रण ठेवा. कोणी काहीही बोलू दे, त्याकडे लक्ष देऊ नका. आपले काम कसे साध्य होईल तेच पाहा. बाकी दिवसांचा कालावधी चांगला असेल. सध्या तरी व्यवसायात मोठी गुंतवणूक करू नका. नोकरदार वर्गाला जबाबदारीने काम करावे लागेल. आर्थिक बचत करणे योग्य राहील. समाजसेवा करा, पण आजूबाजूच्या परिस्थितीचे भान ठेवा. घरातील वैयक्तिक गोष्टी दुसऱ्यांसमोर मांडत बसू नका. आरोग्याच्या बाबतीत निष्काळजीपणा टाळा.
वृश्चिक : श्रेय मिळेल
सप्ताहात वातावरण सर्वच दृष्टिकोनातून अनुकूल आहे, त्यामुळे आपण म्हणाल ती पूर्व दिशा असेल. काय करावे काय करू नये अशी द्विधावस्था सध्या तरी होणार नाही. काम कमी आणि मनोरंजन जास्त अशी तुमची मानसिकता राहणार आहे. चांगले दिवस असले की तुम्ही करमणुकीकडे जास्त कल असतो आणि तुम्ही कामाचे मनावर घेत नाही. चांगल्या दिवसांत काम कसे पूर्ण होईल यासाठी आराखडा तयार करा म्हणजे त्रास होणार नाही. व्यवसायात मोबदला चांगला मिळेल. नोकरदार वर्गाला वरिष्ठांची शाब्बासकी मिळेल. आर्थिक लाभ होईल.
धनू : आनंदयात्रा घडेल
४ तारखेचा संपूर्ण दिवस ५ तारखेला दुपारपर्यंत असा दीड दिवसांचा कालावधी शुभ नाही, त्यामुळे या कालावधीत महत्त्वाचे काम करू नका. बाकी दिवसांचा कालावधी चांगला असेल. कालावधी चांगला असला की तुम्ही हात धुऊन घेता. म्हणजे काय ज्या कामाची गरज नाही अशा कामाच्या मागे लागता. कारण नसताना पैसा व वेळ खर्च करता व मनोरंजन कसे होईल ते पाहता. तेव्हा विचारपूर्वक निर्णय घ्या. व्यवसायात सध्या चांगले दिवस आले आहेत असेच वाटेल. नोकरदार वर्गाला कामाच्या बाबतीत त्रास होणार नाही. आर्थिक बाबतीत अनपेक्षित लाभ होईल. समाजसेवेत सहभाग राहील. मित्र-मैत्रिणींशी मनमोकळेपणाने संवाद साधाल. मुलांची साथ राहील. आनंद यात्रा घडेल. मानसिक समाधान लाभेल.
मकर : कुटुंबाशी एकनिष्ठ राहा
५ तारखेला दुपारनंतर दिनांक ६ व ७ असे अडीच दिवस चांगले कसे जातील ते पाहा. असे दिवस असले की तुमची पार मानसिकता बिघडून जाते. कोण आपल्या तावडीत सापडते, कोणाबरोबर आपल्याला वाद करता येईल हीच मनोवृत्ती राहते आणि अशा वेळी तुम्ही समोर कोण आहे याचे भान ठेवत नाही. तुमच्या मनाला जे वाटेल ते तुम्ही बोलता आणि स्वत: त्रास करून घेता. अशा दिवसांत इतरांचे ऐकून घेण्याची मानसिकता ठेवा म्हणजे त्रास होणार नाही. बाकी दिवस चांगले असतील. व्यवसायात उलाढाल जेवढी वाढेल तेवढी धावपळ होईल. नोकरदार वर्गाचा कामाचा व्याप वाढेल. आर्थिक बाबतीत योग्य तो निर्णय घ्या. नातेवाईकांच्या काही गोष्टी तुम्हाला पटणाऱ्या नसतील, पण त्या सोडून द्यायला शिका म्हणजे भांडण होणार नाही.
कुंभ : समतोल साधा
षष्ठ स्थानातून अष्टमस्थानाकडे होणारे चंद्राचे भ्रमण तसे चढउताराचे असणार आहे. सध्या आपल्याला शांततेच्या मार्गाने गोष्टी हाताळाव्या लागतील. काही वेळेला परिस्थिती अशी निर्माण होते की इच्छा नसतानासुद्धा इतरांचे ऐकून घ्यावे लागते, हे मात्र तितके सत्य आहे. ठीक आहे, पण सध्या वेळ आपली नाही हे लक्षात ठेवल्यास त्रास होणार नाही. आपणच शांत राहिलेले चांगले. इतरांना कोणताही सल्ला देत बसू नका. आपल्या कामाव्यतिरिक्त कोणाच्या वैयक्तिक गोष्टींत हस्तक्षेप करू नका म्हणजे नुकसान होणार नाही. प्रत्येक गोष्टीत समतोल साधा. म्हणजे अनुकूलता वाढेल. व्यवसायात कोणतेही निर्णय घाईने घेऊ नका. नोकरदार वर्गाने कामाकडे लक्ष द्या. आर्थिक बाबतीत व्यवहार फसणार नाही याची काळजी घ्या. कुटुंबातील सदस्यांचा आदर करा. मानसिक ताण घेऊ नका. प्रकृती जपा.
मीन : संयम ठेवा
सध्या शुभ ग्रहांची साथ कमी आहे असेच म्हणावे लागेल. जे काम तुम्ही हातात घ्याल त्या कामाला उशीर होईल. आजचे काम उद्यावर जाईल, सुरळीत घडी विस्कळीत होईल. काम करताना एक गोष्ट लक्षात ठेवा. सध्या उशीर गृहीत धरून काम करायचे आहे. इतरांवर अवलंबून राहिल्यास काम होणार नाही. आपले काम आपणच करावे लागेल. स्वार्थापोटी काही लोक तुमच्या जवळ येण्याची शक्यता आहे, अशा लोकांना वेळीच ओळखा. प्रत्येक गोष्टीत संयम ठेवा. व्यवसायात गुंतवणूक टाळा. नोकरदार वर्गाला वरिष्ठांचे मत विचारात घ्यावे लागेल. आर्थिक भार हलका कसा होईल ते पाहा. राजकीय क्षेत्रात हस्तक्षेप करू नका. घरगुती वातावरण चांगले कसे राहील ते पाहा. आध्यात्मिक गोष्टीत गुंतून राहा. आरोग्याची काळजी घ्या.
(टीप : वरील सर्व बाबी लेखणी बुलंद केवळ माहिती म्हणून वाचक-प्रेक्षकांपर्यंत पोहोचवत आहे. यातून लेखणी बुलंद कोणताही दावा करत नाही.)