साताऱ्यात सज्जनगड रस्त्यावर डबेवाडीजवळ रविवारी दुचाकी आणि पिकअप गाडीची जोरदार धडक होऊन भीषण अपघात झाला.या अपघातात दुचाकीवर असलेले दोन अल्पवयीन युवक जागीच ठार झाले, तर एक युवक गंभीर जखमी झाला आहे.
वेदांत शरद शिंदे (वय 15) आणि प्रज्वल नितीन किर्दत (वय 14) अशी मृत मुलांची नावे असून एक मुलगा गंभीर जखमी झालाय. त्याच्यावर शासकीय रुग्णालयात उपचार सुरु आहेत.
मिळालेल्या माहितीनुसार, वेदांत, प्रज्वल आणि त्यांचा एक मित्र दुचाकीवर ट्रिपल सीटने घरी निघाले होते. सज्जनगड रस्त्यावर डबेवाडीच्या जवळ त्यांच्या दुचाकीला समोरून भरधाव वेगात आलेल्या पिकअप गाडीने जोरदार धडक दिली.
अपघाताची माहिती मिळताच सातारा तालुका पोलिसांनी घटनास्थळी धाव घेतली. पोलिसांनी पिकअप गाडीचा चालक ताब्यात घेतला असून त्याच्याविरोधात सातारा तालुका पोलीस ठाण्यात गुन्हा दाखल करण्यात आला आहे.