बीड (Beed) जिल्ह्यात एक धक्कादायक घटना घडली आहे. पोलीस (Police) भरतीची तयारी करणाऱ्या तरुणाचा मृतदेह गळफास घेतलेल्या अवस्थेत संशयास्पद आढळून आला आहे. या तरुणाचे पाय देखील दोरीने बांधलेल्या स्थितीत दिसून आले आहेत. त्यामुळं ही आत्महत्या आहे की हत्या याबाबत पोलिसांनी अधिकचा तपास सुरु केला आहे.
तरुणाचे पाय दोरीने बांधलेल्या स्थितीत
पोलीस भरतीची तयारी करणाऱ्या एका 20 वर्षीय तरुणाचा मृतदेह झाडाला गळफास घेतलेल्या अवस्थेत आढळून आला. या तरुणाचे पाय देखील दोरीने बांधलेल्या स्थितीत दिसून आल्यानं आत्महत्या की हत्या? असा संशय व्यक्त केला जातो आहे. गणेश बहिरवाळ असं मृत तरुणाचे नाव असून तो पोलीस भरतीची तयारी करत होता.
एका ट्रक चालकाने हा मृतदेह पाहिला
व्यायामासाठी घराबाहेर पडला असता बीड बायपासवरील छत्रपती संभाजी महाराज चौका नजीक असलेल्या एका शेतात गणेशचा मृतदेह गळफास घेतलेल्या अवस्थेत आढळून आला. एका ट्रक चालकाने हा मृतदेह पाहिल्याने टोल फ्री क्रमांकावर घटनेची माहिती दिली. पोलिसांनी तात्काळ घटनास्थळी धाव घेत मृतदेह शवविच्छेदनासाठी जिल्हा रुग्णालयात दाखल केला. दरम्यान याप्रकरणी पोलीस अधिक तपास करत आहेत.
एसटी महामंडळात क्लर्क असलेल्या कर्मचाऱ्यानं केली आत्महत्या
बीडमध्ये आणखी एक धक्कादायक घटना घडली आहे. एसटी महामंडळात क्लर्क म्हणून कार्यरत असलेल्या कर्मचाऱ्याने गळफास घेऊन आत्महत्या केली आहे. या घटनेनंतर वरिष्ठांवर कारवाई करा अशी मागणी नातेवाईकांनी करत मृतदेह थेट आगारात आणला आहे. दरम्यान, आत्महत्या केलेल्या कर्मचाऱ्याच्या नातेवाईकांनी वरिष्ठांच्या त्रासाला कंटाळून आत्महत्या केल्याचा आरोप केला आहे.
वरिष्ठांच्या त्रासाला कंटाळून आत्महत्या, नातेवाईकांचा आरोप
एसटी महामंडळात वर्कशॉपमध्ये क्लर्क म्हणून कार्यरत असलेल्या एका कर्मचाऱ्याने गळफास घेऊन आत्महत्या केली. प्रितेश मोहिते असं कर्मचाऱ्यांचे नाव असून ते बीडच्या गेवराई आगारातील वर्कशॉपमध्ये कार्यरत होते. मात्र सतत वरिष्ठांच्या त्रासाला कंटाळून त्यांनी आत्महत्या केल्याची माहिती कुटुंबीयांनी दिली आहे. दरम्यान या प्रकरणात दोषींवर कारवाई व्हावी. या मागणीसाठी संतप्त नातेवाईकांनी थेट मृतदेह गेवराई आगारात नेऊन ठेवला. पोलिसांच्या मध्यस्थीने कुटुंबियांची समजूत काढण्याचा प्रयत्न सध्या सुरू आहे. मात्र दोशींवर कारवाईची मागणी मृत कर्मचाऱ्यांच्या कुटुंबाकडून केली जात आहे.