बांगलादेश क्रिकेट संघाने पाकिस्तानविरूद्धच्या कसोटी मालिकेत इतिहास घडवला आहे. बांगलादेशने पाकिस्तानच्या घरच्या मैदानावर कसोटी सामन्यात पाकिस्तानचा दारूण पराभव केला आहे. बांगलादेशने पाकिस्तानला रावळपिंडी कसोटीत ६ विकेट्सने पराभूत केलं. या पराभवासह बांगलादेशने २-० ने मालिका आपल्या नावे केली आहे. पाकिस्तानला पहिल्या कसोटी सामन्यात बांगलादेशविरूद्ध १० विकेट्सने पराभव पत्करावा लागला होता. ज्याप्रकारे बांगलादेशने पाकिस्तानला पहिल्यांदा कसोटीत पराभूत करत इतिहास रचला त्यातप्रमाणे आता त्यांना कसोटी मालिका आपल्या नावे करत मोठा इतिहास रचला आहे.
दुसऱ्या कसोटी सामन्याची नाणेफेक जिंकत बांगलादेशने प्रथम गोलंदाजी करण्याचा निर्णय घेतला होता. पाकिस्तानने प्रथम फलंदाजी करताना २७४ धावा करत सर्वबाद झाले. ज्यात बांगलादेशच्या गोलंदाजांनी चमकदार कामगिरी केली. तर बांगलादेशचा संघ २६२ धावा करत सर्वबाद झाला. बांगलादेशकडून लिटन दासने १३८ धावांची उत्कृष्ट खेळी केली. तर मेहदी हसनने ७८ धावांची निर्णायक खेळी केली. १२ धावांच्या आघाडीसह पाकिस्तानने आपला दुसरा डाव सुरू केला. पण संघ १७२ धावा करत सर्वबाद झाला. यासह बांगलादेशला विजयासाठी १८५ धावांचे आव्हान मिळाले होते जे बांगलादेशने ६ विकेट्स राखत सहज गाठले.
पाकिस्तान आणि बांगलादेश यांच्यात दोन सामन्यांची कसोटी मालिका खेळवली गेली. या मालिकेतील पहिला सामना बांगलादेश संघाने जिंकला होता. पहिला सामना बांगलादेशने १० गडी राखून जिंकला होता. मालिकेतील दुसऱ्या सामन्यातही बांगलादेश संघाने चांगली कामगिरी केली. दरम्यान, रावळपिंडीत खेळल्या जाणाऱ्या दुसऱ्या कसोटी सामन्यात बांगलादेश संघाने एक मोठा विक्रम केला आहे.
बांगलादेश संघाने दुसऱ्या कसोटी सामन्याच्या दुसऱ्या डावात पाकिस्तानला ऑलआऊट केलं. बांगलादेशच्या वेगवान गोलंदाजांनी या सर्व १० विकेट्स घेतल्या. फिरकी गोलंदाजांनीही यात योगदान दिले. बांगलादेशच्या तस्किन अहमद, हसन महमूद आणि नाहिद राणा यांनी पाकिस्तानविरुद्ध विकेट घेतल्या. या तिन्ही गोलंदाजांनी अप्रतिम कामगिरी केली. यादरम्यान हसन महमूदने पाच विकेट घेतल्या. नाहिद राणाने चार आणि तस्किन अहमदने एक विकेट घेतली.