हिंगोली जिल्ह्यातील शिरड शहापूर गावामध्ये शेतमजुरीचे पैसे मागितल्याच्या कारणावरून मजुराला तीन ते चार जणांकडून बेदम मारहाण करण्यात आल्याचा धक्कादायक प्रकार उघडकीस आला आहे. आनंद मोरे हे शेतमजूर काही दिवसापूर्वी उमरा गावातील शेतकरी दिलीप बोंगाणे यांच्या शेतामध्ये हळद शिजवण्याचं काम करण्यासाठी गेले होते. त्याच कामाचे थकीत असलेले मजुरीचे 600 रुपये मागण्यासाठी आनंद मोरे हे त्यांच्या शिरडशहापूर येथील दुकान वर गेले होते. शेतकरी दिलीप बोंगाणे यांनी मजुरीचे पैसे देण्यासाठी टाळाटाळ केली त्यानंतर मोरे यांनी त्यांना विनंती केली. परंतु पैसे मागण्याचा तगादा का लावतोयस असं म्हणत आनंद मोरे यांना बोंगणे आणि त्यांच्या काही सहकाऱ्यांनी मिळून काठी लोखंडी रॉडसह लाथा बुक्क्यांनी मारहाण केली आहे.
दरम्यान या मारहाणीचा व्हिडीओ आता एबीपी माझाच्या हाती लागला आहे. या व्हिडीओमध्ये तीन ते चार जण आनंद मोरे यांना बेदम मारताना पाहायला मिळत आहे. या प्रकारानंतर मोरे यांनी औंढा नागनाथ पोलीस ठाणे गाठत तक्रार दिली असता पोलिसांनी हिंगोलीच्या शासकीय रुग्णालयामध्ये पाठवले उपचारासाठी पाठवले आहे. आता आनंद मोरे यांच्यावर हिंगोलीच्या जिल्हा सामान्य रुग्णालयामध्ये उपचार सुरू असून आरोपी विरोधात गुन्हा दाखल करून त्यांच्यावर कार्यवाही करावी अशी मागणी करण्यात येत आहे.
सोलर कंपनीच्या कर्मचाऱ्यांची शेतकऱ्यावर दादागिरी
राज्य शासनाच्या वतीने शेतकऱ्यांना सोलार कृषी पंप सबसिडी स्वरूपामध्ये दिला जातो या योजनेमध्ये निवड झालेल्या हिंगोली च्या वसमत तालुक्यातील सिद्धकला या सोलर कंपनीच्या वतीने सोलार पंप साहित्य नेण्यासाठी वसमत येथील कंपनीच्या गोडाऊन वर बोलण्यात आलं शेतकरी तिथे गेल्यानंतर त्यांना सामान भरून देण्यास कंपनीच्या कर्मचाऱ्यांकडून टाळाटाळ करण्यात आली. जाब विचारला असता कंपनीच्या कर्मचाऱ्याकडून शेतकऱ्यालाच शिवीगाळ आणि दादागिरी ची भाषा करण्यात आली एवढेच नाही तर कंपनीचे कर्मचारी शेतकऱ्यांना मारहाण करण्यासाठी सुद्धा आक्रमक झाले होते दरम्यान उपस्थित नागरिकांनी मध्यस्थी केल्याने वाद मिटला आहे शेतकऱ्याने वारंवार विनवण्या केल्यानंतर संबंधित सोलार कंपनीने शेतकऱ्याला साहित्य दिले आहे या शिवीगाळीचा व्हिडिओ सध्या सोशल मीडियावर व्हायरल होत असून संबंधित सोलार कंपनीवर कार्यवाही करावी अशी मागणी शेतकऱ्यांच्या वतीने केली जात आहे