गेल्या आठवड्यात UPSC चा निकाल लागला. यात महाराष्ट्रातील अनेक विद्यार्थ्यांनी यश मिळवलं आहे. मात्र, यवतमाळ जिल्ह्यातील महागाव तालुक्यातील वागद (इजारा) येथून अत्यंत धक्कादायक बातमी समोर येत आहे. मुलगी जिल्हाधिकारी झाल्यानंतर आनंदोत्सव साजरा करताना वडिलांचा हृदयविकाराच्या झटक्याने मृत्यू झाला (Father Dies Of Heart Attack While Celebrating Daughter’s UPSC Success). प्रल्हाद खंदारे असं मृत व्यक्तीचे नाव आहे. ते पुसद पंचायत समितीचे निवृत्त विस्तार अधिकारी होते.
खंदारे यांची मुलगी मोहिनी हिने काही दिवसांपूर्वीच जाहीर झालेल्या यूपीएससी निकालात प्रभावी क्रमांक मिळवला होता. कुटुंब, शेजारी, नातेवाईक आणि हितचिंतक त्यांच्या आयुष्यातील या अभिमानास्पद क्षणाचे स्मरण करण्यासाठी जमले होते आणि ते सर्वजण आनंद साजरा करत होते. याठिकाणी मुलीचे वडील प्रल्हाद खंदारे यांचे मुलीच्या तयारीसाठी केलेल्या कठोर परिश्रम आणि समर्पणाबद्दल कौतुक केले जात होते. त्यांच्या मुलीच्या यूपीएससी परीक्षेतील यशाने त्यांचे छोटेसे गाव राष्ट्रीय स्तरावर प्रसिद्ध झाले होते. खरं तर, या यशामुळे गावाला देशभरात ओळख मिळाली.
स्थानिक सूत्रांनुसार, खंदारे त्यांच्या मुलीच्या यशाने भावनिक आणि आनंदी झाले. आनंदोत्सव सुरू असतानाच प्रल्हाद खंदारे अचानक कोसळले. कुटुंबातील सदस्य, नातेवाईक आणि शेजारी त्यांना जवळच्या वैद्यकीय संस्थेत घेऊन गेले, परंतु तेथे पोहोचताच त्यांना मृत घोषित करण्यात आले. डॉक्टरांनी पुष्टी केली की, त्यांचा मृत्यू हृदयविकाराच्या झटक्याने झाला.
मोहिनीच्या उल्लेखनीय कामगिरीने आनंदी झालेल्या गावावर काही मिनिटांत शोककळा पसरली. या घटनेमुळे प्रल्हाद खंदारे यांच्या कुटुंबियांवर तसेच जिल्हाधिकारी म्हणून निवड झालेल्या मोहिनी खंदारे यांच्यावर दु:खाचा डोंगर कोसळला आहे.