गरोदर महिलेवर डिपॉझिटअभावी उपचार न करुन तिच्या मृत्यूला कारणीभूत ठरल्याचा ठपका असणाऱ्या दीनानाथ मंगेशकर रुग्णालयाबाबत (Dinanath Mangeshkar Hospital) एक मोठी बातमी समोर आली आहे. पुण्यातील दिनानाथ रुग्णालयाला आता महापालिकेने (Pune Municipal Corporation) दणका दिला आहे. गेल्या 8 वर्षापासून 27 कोटी मिळकतकर थकविल्याप्रकरणी रुग्णालयाला महापालिकेने नोटीस पाठवली आहे. ज्यामध्ये 2 दिवसात 22 कोटी जमा करा, अन्यथा जप्तीची कारवाई होईल, असा इशारा महापालिकेने दीनानाथ रुग्णालयाला दिला असून तसा उल्लेख या नोटीसमध्ये करण्यात आला आहे.
पुण्यातील नामांकित दीनानाथ मंगेशकर रुग्णालयाने (Dinanath Mangeshkar Hospital) महापालिकेचा तब्बल 27 कोटींचा मिळकतकर थकविल्याचे समोर आलं होतं. तसेच रुग्णालयाने गेल्या सहा वर्षात एकही रुपयाचा कर भरला नसल्याची माहिती पुढे आली होती. त्यामुळे पुणे महापालिकेने आता यावर कारवाईचा बडगा उगरत रूग्णालयाला जप्तीची नोटिस पाठविली आहे. मिळकत कराचे 22 कोटी रुपये दोन दिवसांत जमा करावी, अन्यथा पुढील कारवाई केली जाईल, असा इशारा महापालिका प्रशासनाने नोटीशीद्वारे दिला आहे. त्यामुळे रुग्णालय प्रशासन या बाबत नेमकं काय पाऊल उचलतं हे पाहणे महत्वाचे ठरणार आहे.
जागामालक खिलारे कुटुंबीय भिसे कुटुंबियांची भेट घेणार
अशातच दीनानाथ मंगेशकर रुग्णालयाचे मूळ जागामालक खिलारे कुटुंबीय भिसे कुटुंबियांची भेट घेणार असल्याची माहिती समोर आली आहे. भिसे कुटुंब यांच्या भेटीसाठी खिलारे कुटुंब दाखल होणार आहे. हॉस्पिटल उघडण्यासाठी जागा दिली याचा पश्चाताप होतोय. अशा प्रकारचे मत खिलारे कुटुंबियांनी मांडलं होतं. त्यानंतर आता खिलारे कुटुंब भिसे कुटुंबाच्या भेटीला दाखल होणार आहे.
रुग्णालय परिसरात आंदोलनास बंदी, पुणे पोलिसांनी मोठं पाऊल
दुसरीकडे, दीनानाथ मंगेशकर रुग्णालयासंदर्भात पुणे पोलिसांनी मोठं पाऊल उचलेले आहे. आता रुग्णालय परिसरात आंदोलनास बंदी घालण्यात आली आहे. रुग्णालयाच्या 100 मीटर परिसरात हे निर्बंध लागू असणार आहे. रुग्णालय परिसरात रुग्णांच्या नातेवाईकांशिवाय इतर इसमांना एकत्र जमण्यास प्रतिबंध घालण्यात आला आहे. दीनानाथ मंगेशकर रुग्णालयात एक दोन किंवा दोन पेक्षा जास्त व्यक्ती एकत्र येण्यास मनाई करण्यात आली आहे.
शिवाय रुग्णालय परिसरात कोणत्याही आंदोलनाला आता परवानगी नसणार आहे. तर पुढील दहा दिवसांसाठी हे निर्बंध असणार असल्याची माहिती पुढे आली आहे. सोबतच, पोलिसांनी दिलेल्या आदेशाचे उल्लंघन करतील त्यांच्यावर कायद्यानुसार कारवाई केली जाणार असल्याची माहिती ही पुणे पोलिसांनी दिली आहे. सह पोलीस आयुक्त रंजनकुमार शर्मा यांनी हे आदेश काढले आहेत.